İslam Əməkdaşlıq Təşkilatı Gənclər Konfransı (İKGF) "erməni soyqırımı" iddiaları ilə bağlı Almaniyada maarifçilik kampaniyası başladacaq.

Musavat.com xəbər verir ki, bu barədə Türkiyənin "Sabah" qəzetinə təşkilatın sədri, səfir Elşad İsgəndərov açıqlama verib.

O bildirib ki, Almaniya federal məclisinin "erməni soyqırımı" iddiaları ilə bağlı qətnamə layihəsinin qəbulundan sonra İKGF-nin 9 üzv ölkə nümayəndələrindən ibarət idarə heyətinin toplantısı çağırılıb.

İKGF idarə heyətinin yaydığı bəyanatda ermənilərin 1915-ci ildə Anadoluda müsəlman kürdlərə və türklərə qarşı törətdiyi qətliamlar və 1992-ci ildə Azərbaycanın Xocalı şəhərində soyqırım törətdiyi qeyd olunur. Bəyanatda Almaniya parlamentinin bu hadisələrə hüquqi qiymət vermədiyi, ancaq siyasi təzyiq vasitəsi olaraq Türkiyə hökumətinə təzyiq məqsədilə bu cür qərar aldığı qeyd olunur.

İKGF Almaniya parlamentinin tarixdə baş verən mübahisəli məsələlər üzərindən siyasi qərar almasının nəticəsində Almaniyada yaşayan milyonlarla türk və bütövlükdə Avropada yaşayan müsəlmanlara qarşı əsassız ayrı-seçkilik çağırışlarına səbəb olacağından narahatlığını bildirib və etnik və dini gərginliyi daha da artıra biləcəyini qeyd edib.

İslam Əməkdaşlıq Təşkilatı Gənclər Konfransı qurumu həm Avropada, həm də bütövlükdə İƏT üzvü ölkələrdə gənclər arasında tarixi həqiqətlərin doğru şəkildə öyrənilməsi və təbliğ olunması üçün proqramlar həyata keçirməyə hazırlaşır. Təşkilatdan verilən açıqlamada bu layihənin icrası üçün İƏT çərçivəsində diplomatik fəaliyyətin başladılması qərara alındığı, eyni zamanda İƏT-in qəbul etdiyi qərara əsasən "20-ci əsrdə müsəlmanların məruz qaldığı humanitar fəlakətlərin yad edilməsi günü" proqramı çərçivəsində 1915-ci ildə Anadoluda müsəlmanlara qarşı ermənilər tərəfindən törədilən zülmləri açıqlayan tədris proqramları təşkil olunacaq.