Əvvəllər bizim sərhədlərimizdə almanlar, indi isə NATO qoşunları dayanır.

Axar.az xəbər verir ki, bunu Dumada çıxışı zamanı Rusiya Liberal Demokrat Partiyasının sədri Vladimir Jirinovski söyləyib. Onun sözlərinə görə, 1941-ci illə 2016-cı il arasında heç bir fərq yoxdur və Qərb də Hitler kimi rus idmançılarına maneə yaratmağa çalışır:

"Mən əminəm ki, artıq yeni Barbarossa planı imzalanıb. Sadəcə, biz bilmirik ki, bu, hansı formatda olacaq. Onlar bizlə Ukrayna arasında yeni müharibə yaradacaq. Ukrayna məğlub olanda onu Almaniya dəstəkləyəcək, Almaniya məğlub olanda isə bütün NATO işə qarışacaq. NATO məğlub olduğu gün amerikalılar Moskvaya nüvə duelinin qarşısının alınması üçün müqavilə təklif edəcəklər. Nəticədə dünyanın bölüşdürülməsi ilə bağlı razılıq olacaq, yeni Yalta və Podstam müqavilələri imzalanacaq".

Qeyd edək ki, Hitlerin Barbarossa planı İkinci Dünya Müharibəsi zamanı Almaniya tərəfindən hazırlanıb. Plana əsasən, SSRİ üzərinə ildırım sürətli hücum olmalı və SSRİ-nin bütün Avropa hissəsi üç ay ərzində ələ keçirilməli idi.