Ötən gün Azərbaycanın avtomobil yollarında baş verən ol qəzalarında 5 nəfər dünyasını dəyişib.

Axar.az xəbər verir ki, Sumqayıt şəhərində Ramil Tahirovun idarə etdiyi şəxsi "Hyunday" və Şəmsəddin Nəcəfovun 3 saylı xətt üzrə idarə etdiyi "İsuzu" markalı avtomobillər toqquşub. Nəticədə R.Tahirov və sərnişinlərindən 30-35 yaşlı qadın hadisə yerində ölüb, digər 2 sərnişini isə xəstəxanaya yerləşdirilib.

Ağsu rayonunun Yenilik kəndində Rusiya Federasiyası vətəndaşı Dmitri Pavlov idarə etdiyi "Hyunday" markalı avtomobili qarşıda gedən rayon sakini Mehman Cavadovun idarə etdiyi "T-40" markalı traktora vurub, idarəetməni itirdiyindən yolun əks istiqamətinə çıxıb Göyçay rayon sakini İntiqam Bəkirovun idarə etdiyi "Mersedes" markalı avtomobillə toqquşub. Nəticədə D.Pavlovun sərnişinlərindən həmyerlisi Aleksandra Liçkina hadisə yerində ölüb, digər həmyerlisi xəstəxanaya yerləşdirilib.

Lənkəran rayonunun Digah kəndində rayon sakini Samid Ağayev idarə etdiyi VAZ-21074 markalı avtomobillə yolu keçən Ağdam rayon sakini Qurban Abbasovu vurub və o, hadisə yerində ölüb.

Sabirabad rayonunun Qaragüney kəndində rayon sakini Miraləm Abdullayev idarə etdiyi VAZ-2106 markalı avtomobillə yolu keçən kənd sakini Məhərrəm Hüseynovu vurub və o, hadisə yerində ölüb.