AŞPA-da çıxış edən Moldovanın Baş naziri Pavel Filiplə millət vəkili Qənirə Paşayevanın görüşü olub.

Axar.az xəbər verir ki, görüş zamanı ölkələrimiz arasında genişlənən əməkdaşlıqla bağlı Q.Paşayevanın fikirlərini dəstəkləyən baş nazir bu əməkdaşlığın daha da inkişaf edəcəyini bildirib.

Qazaxıstan nümayəndə heyəti ilə görüşdə isə Qənirə Paşayeva Azərbaycan-Qazaxıstan münasibətlərinin son illər daha yüksək səviyyədə inkişafını sevindirici hadisə olaraq qiymətləndirib. Ölkələrimizin rəhbərləri İlham Əliyev və Nursultan Nazarbayev arasında olan yüksək dostluq münasibətlərinin ölkələrimizin daha da yaxınlaşmasına müsbət təsir göstərdiyindən, görülən önəmli işlər və layihələrdən danışan millət vəkili Qənirə Paşayeva Azərbaycan parlamentinin də Qazaxıstanla əlaqələrin və dostluğun inkişafına böyük önəm verdiyini, parlamentlərarası əməkdaşlığın daha da genişləndiyini və bu istiqamətdə münasibətlərin getdikcə daha da artmasının məmnuniyyət yaratdığını deyib.

Qazaxıstanın AŞPA-da müşahidəçilik statusu almasında Azərbaycanın dəstəyini hər zaman xatırladıqlarını deyən Qazaxıstan nümayəndə heyətinin üzvləri iki qardaş ölkə olan Azərbaycan ilə Qazaxıstan arasında əlaqələrin bütün istiqamətlərdə yüksək səviyyədə olmasını və bu əməkdaşlığın daha da artacağına inandıqlarını deyiblər.