Türkiyə ilə bağlı məsələlər həssas yanaşma tələb etdiyi üçün prosesləri ətraflı və tamamilə obyektiv şəkildə təhlil etmək bir qədər çətindir.

Bu sözləri Axar.az-a açıqlamasında analitik Elçin Mirzəbəyli deyib. O hesab edir ki, indiki halda baş verənlərə yalnız Türkiyənin maraqları müstəvisindən yanaşmaq mümkündür.

“Afrində həyata keçirilən əməliyyatlar bilavasitə Türkiyənin təhlükəsizliyi ilə bağlı olan məsələdir. Ankara ölkənin sərhədlərinin toxunulmazlığını, sərhəd bölgəsində yaşayan əhalinin təhlükəsizliyini təmin etmək üçün hərbi əməliyyatlar keçirməyə məcburdur. Uzun illərdir ki, aqressiv separatizm, terror Türkiyənin ərazi bütövlüyünü, təhlükəsizliyini təhdid edir. Şübhəsiz ki, bu prosesin qarşısının alınması, yeni təhdidlərə imkan verilməməsi Türkiyə üçün prioritet məsələdir. Ümid edirəm ki, bu əməliyyatlar tez bir zamanda və Türkiyənin qarşısına qoyduğu məqsədlərə çatması ilə nəticələnəcək”.

Qeyd edək ki, Türkiyə Silahlı Qüvvələri və Azad Suriya Ordusunun iştirakı ilə Afrində YPG-yə qarşı başladılan “Zeytun budağı” əməliyyatları nəticəsində türk ordusu PKK-nın nəzarətindəki kəndlərə daxil ola bilib.