Ana səhifə Gündəm |
İrəvan və Qarabağ separatçıları arasında ziddiyyətlərin dərinləşməsi yeni çatın yaranması ilə nəticələnə bilər.
Bu sözləri Axar.az-a açıqlamasında politoloq Əhəd Məmmədli deyib. O bildirib ki, inqilabdan sonra başlayan bu ziddiyyətlər davam edir:
“Qarabağ klanının rəhbəri Köçəryanın qısa müddətdə ikinci dəfə həbs edilməsi bu ziddiyyətləri daha da dərinləşdirdi. Paşinyan tez-tez Dağlıq Qarabağa gəlib, Saakyanla görüşür, oğlunu əsgərliyə Azərbaycan ərazilərinə göndərib və separatçıları təsiri altında saxlamağa çalışır. Ancaq Köçəryanın həbsinə səssiz qalan Qarabağ klanı və Moskva Paşinyanın əhali arasında nüfuzu düşməyə başlayan kimi dərhal hücuma keçəcək. Prezident İlham Əliyev çıxışında əbəs yerə söyləmədi ki, Qarabağ münaqişəsinin həll edilməsi üçün əlverişli şərait yaranıb. İrəvanın Moskva və Qarabağ separatçıları ilə üz-üzə gəlməsi bu şəraiti yaradan səbəblərdəndir. Rəsmi İrəvanla və artıq müxalifətə keçən Qarabağ klanı arasında qarşıdurma açıq müstəviyə keçsə, Rusiya həm Ermənistana, həm də separatçı quruma siyasi müdaxilə edəcək”.
Politoloq vurğulayıb ki, əgər Saakyan baş qaldırsa, bu, Paşinyan üçün ciddi problemə çevrilə bilər:
“Hətta vəziyyət o yerə çatar ki, Rusiya Ermənistandakı ordusundan siyasi müdaxilə üçün istifadə etməyə məcbur olar. Proseslərin bu istiqaməti isə Azərbaycana ərazi bütövlüyünü təmin etmə imkanı aça bilər”.
Tarix
2018.12.15 / 08:30
|
Müəllif
Firuzə Vahidqızı
|