Paytaxt polisi partlayıcı paketlərin və fişənglərin qanunsuz satışı ilə bağlı reydlər keçirir.

Axar.az-ın məlumatına görə, Bakının bir çox yerlərində "partlayan paket" deyilən oyuncaq partladanların satışı qadağan olunub. Ölkəyə gətirilməsi yasaqlanan bu malları satanlar cərimələnir, malları müsadirə olunur. Reydlərin Yeni ilə qədər davam edəcəyi bildirilir.

Qeyd edək ki, bir neçə gün əvvəl keçirilən əməliyya tədbirləri nəticəsində Biləcəri Dəmir Yolu Stansiyasının ərazisində səyyar satışla məşğul olan Cəfər Daşdəmirovdan 2800 ədəd yüksək səsyayıcı qabiliyyətə malik olan partlayıcı oyuncaqlar və pirotexniki məmulat götürülüb. Bundan əvvəl də Bakıda satışda külli miqdarda partlayıcı vəsaitlər tapılmışdı.

Keçirilən əməliyyat tədbirləri nəticəsində Lökbatan qəsəbəsindəki ticarət mərkəzində Bakı şəhər sakini Etimat Hüseynovdan 22280 ədəd pirotexniki məmulat götürülüb.

Qadağalara baxmayaraq, təəssüf ki, bəzən yanğınlara gətirib çıxaran və insanların səhhətinə mənfi təsir edən bu oyuncaq partlayıcılar Yeni il rəmzi kimi təbliğ olunur və qeyri-qanuni olaraq satılır.