İcra Hakimiyyətinə yeni təyinatla bağlı xəbər bu dəfə Mingəçevirdən gəlib.

Mingəçevir şəhər İcra Hakimiyyətinin əməkdaşı olan Məhluqə Əbil qızı Cavadova başçının müavini təyin edilib. Bu barədə "Axar.az"a İcra Hakimiyyətinin ictimai-siyasi və humanitar məsələlər şöbəsinin baş məsləhətçisi Sahib Əliyev məlumat verib.

1965-ci il təvəllüdlü M.Cavadova müavin olaraq həm də şəhər təsərrüfatı şöbəsinə rəhbərlik edəcək. Buna qədər isə o, İcra Hakimiyyətində informasiya sektorunun müdiri işləyib.

Ali təhsilini Rusiyada alan M.Cavadova ixtisasca mühəndis-mexanikdir. Əvvəllər Mingəçevir Statistika İdarəsində, Şəhər Bələdiyyəsində işləyib. 2007-ci ildən isə İcra Hakimiyyətində çalışmağa başlayıb. Subaydır.

Xatırladaq ki, rayon İcra Hakimiyyəti başçılarının müavinlərinin qadın mütəxəssis olması barədə Prezident Administrasiyasından tapşırıq verilib. Artıq paytaxtda, eləcə də bir sıra regionlarda yeni təyinatlar baş tutub.