"Borussiya" (Dortmund) klubunun erməni hücumçusu Henrik Mxitaryan Avropa Liqasının qrup mərhələsində "Qəbələ"yə 4:0 hesabı ilə qalib gəldikləri oyundan sonra müsahibə verib.

Axar.az xəbər verir ki, erməni futbolçu "Qəbələ" ilə matçın çətin keçdiyini etiraf edib:

"Qola qədər bir qədər çətinlik çəkdik. Amma hesabı açdıqdan sonra daha rahat oynamağa başladıq. Ardınca ikinci qolu da vurduq. Fasilədən sonra da üstün oynadıq. Layiqli qələbə qazandığımızı düşünürəm. "Qəbələ" pis komanda deyil. Yaxşı mübarizə apardılar. "Qəbələ"nin baş məşqçisini də yaxşı tanıyıram. Eləcə də futbolçuları. Aleksey Qayla bir komandada oynamışam. "Qəbələ"yə qarşıdakı oyunlarda uğurlar arzulayıram".

Bakıya gəlmək istədiyini deyən erməni forvard təhlükəsizlik məsələlərinə görə son anda qərarını dəyişdiyini deyib:

"Mən Bakıya gəlmək istəyirdim. Amma təhlükəsizliklə bağlı suallar var idi. Buna görə də yekun qərar oldu ki, Bakıya getməyim. Bu, insanların məni necə qəbul etməsindən asılıdır. Ona görə də dəqiq heç nə deyə bilmərəm. Bu gün tribunada Ermənistan bayraqları da var idi. Bu hal Bundesliqada olur. Ermənilər həmişə "Borussiya"nın oyununa gəlirlər. Lakin xüsusi olaraq bugünkü oyun üçün də gələnlər var idi. Oyundan əvvəl də demişdim ki, bu, mənim üçün xüsusi oyun deyildi. "Qəbələ"yə qol vurmaq mənim üçün xüsusi əhəmiyyət kəsb etmirdi. Təbii ki, qol vurmaq hər zaman xoşdur".