Gələn ilin büdcəsinin xərcləri daha irimiqyaslı olduğundan təhsil, səhiyyə və digər sahələrə daha çox vəsait ayrılacaq. Lakin gələn ilin büdcəsi də özü ilə bir sıra problemləri daşıyacaq.

Axar.az xəbər verir ki, bu sözləri millət vəkili Əli Məsimli Milli Məclisdə 2019-cu ilin büdcə layihəsinin müzakirəsi zamanı deyib.

Millət vəkili bildirib ki, dövlət büdcəsinin gəlirlərinin artırmaq üçün bir sıra təkliflər irəli sürüb:

“2018-19-cu ilin büdcəsinin özündən əvvəlki 3 illə müqayisədə neftdən asılılığı artıb. Təcrübə göstərir ki, vergilər, rüsumlar xətti ilə cari xərcləri ödəmək mümkün deyil. Ona görə də Dövlət Neft Fondunun vəsaitinə ehtiyac var. Lakin Neft Fondundan istifadənin müəyyən meyarı olmalıdır. Korrupsiyaya qarşı mübarizəni gücləndirməklə büdcəyə 100 milyonlarla vəsait cəlb edilə bilər ki, bununla da xeyli sosial layihələrə vəsait artırmaq mümkün olar”.

Millət vəkili onu da vurğulayıb ki, büdcə xərclərinin artırılmasından daha çox, həmin xərclərin nə qədər sosial, iqtisadi layihələrin icrasına səmərəli tətbiqini təmin etmək vacib məsələdir:

“Qeyri-neft sənayesində artım müşahidə edilir. Təmir-tikinti adı ilə külli miqdarda vəsait aidiyyəti üzrə istifadə edilmirsə və bu vəsaitlər iqtisadi inkişafımıza təsir etmirsə, bu məsələyə yenidən baxılmalıdır. 2019-cu il büdcəsi sosial yönümlü hesab olunsa da, büdcənin sosial yükü aşağıdır. Gələn il 24.8 milyard manatlıq büdcənin 28 faizi investisiya xərclərinə, 6.5 faizi isə səhiyyə xərclərinə yönəlib. İnvestisiya xərcləri elmə yönələn vəsaitdən 51 dəfə çoxdur. Vəsaitdən təmir-tikinti üçün istifadə etmək yaxşıdır, amma bu qədər yox. Biz elmi-texniki tərəqqiyə vəsait ayırmadan necə inkişaf edəcəyik? Təhsilə ayrılan xərcləri tədricən artırmaqla, yaxın illərdə müəllimlərə indikindən 2-3 dəfə artıq maaş vermək mümkün olacaq”.