Moskva diyarının qubernatoru Andrey Vorobyev Azərbaycanın Səhiyyə naziri Oqtay Şirəliyevin qızı Nərmin Şirəliyevi Mədəniyyət naziri vəzifəsinə təyin edib.

Kult.az xəbər verir ki, N.Şirəliyeva 9 noyabr 1974-cü ildə Bakıda anadan olub. 1991-ci ildə Moskva Dövlət Beynəlxalq Münasibətlər İnstitutunun jurnalistika bölməsinə daxil olub. İngilis və fransız dillərini bilir.

Təhsil aldığı illərdə paralel olaraq Rusiya mediasında, əsasən, mədəniyyət sahəsində, fəaliyyət göstərib. 1995-ci ildən İTAR-TASS-da kriminal-hüquqi şöbədə işləyib. Daha sonra “Kultura”da çalışıb. Burada və digər media qurumlarında çalışarkən humanitar sahə üzrə bir sıra layihələr işləyib. “Kultura” telekanalında şef-redaktor, icmalçı, "Mədəniyyət yenilikləri" proqramının aparıcısı, Rusiya Dövlət Filarmoniyasında təşkil olunan konsertlərin aparıcısı vəzifələrində çalışıb, Moskvanın aparıcı KİV-lərində köşə yazıları ilə çıxış edib. O, mədəniyyət sahəsində fəaliyyətinə görə Moskva şəhər meriyasının laureatı adına layiq görülüb, "Qızıl lira" mükafatı ilə təltif olunub.

2011-ci ildən hakim Vahid Rusiya Partiyasının üzvüdür.

1997-ci ildə Nərmin Şirəliyeva tanınmış rejissor Yevgeni Qinzburqa ərə gedib. Bu, Qinsburqun ikinci evliliyidir. Ailənin 1999-cu ildə oğlu dünyaya gəlib, adı Aleksandrdır.

2001-ci ildə MDBMİ-nun aspiranturasına daxil olub və 2004-cü ildə “20-ci əsrdə Rusiya və Fransa mədəni əlaqələri” mövzusunda dissertasiya müdafiə edib, tarix elmləri namizədidir.

N.Şirəliyevanın əri Y.Qinsburq 2012-ci ildə, 66 yaşında insultdan dünyasını dəyişib.