Ana səhifə Kult |
Axar.az-ın "Rol yoldaşı" layihəsinin budəfəki qonağı xalq artisti Firəngiz Mütəllimovadır. O, "Bəyin oğurlanması" filmində birgə rol aldığımərhum aktyorumuz Səməndər Rzayevlə bağlı xatirələrini bölüşür:
"Səməndər Rzayevi çox istəyirdim. O da məni. O vaxtlar çoxlu qastrol səfərlərində olmuşuq. Bizi yaxınlaşdıranNahid Hacıyevin "Məhəbbət yaşadır" tamaşası oldu. Orada mənim atam rolunda idi, bu tamaşa uzun müddət davam etdi. Böyük sənətkar olmağı ilə yanaşı, çox mehriban, uşaq qəlbli biri idi. Hələ də onun səsi qulağımdadır; əlini vururdu stola, deyirdi, "şapla gəlsin!". Onun səsləndirdiyi filmlərdə səsinin gözəlliyi bir daha görünür. Mən bir müddət Səməndər Rzayevin oğlu ilə işləmişəm. Ona baxanda hər dəfə atasını xatırlayırdım. Oğlu bir az çılğın idi, ancaq Səməndər daha sakitdi.
Bir dəfə qastroldaydıq. Böyük bir klub idi, camaat yığılmışdı. Mən də səhnədə qışqıra-qışqıra danışırdım. Səməndər astaca dedi ki, niyə qışqırırsan?! Onsuz da hələ heç kim, heç nə eşitmir. Rayon tamaşaçıları elədir ki, qəfildən sakitləşir. Nə vaxt sakitləşdilər,başlayarsan. Bir az öz aramızda danışırdıq ki, birdən doğurdan da qəribə bir sükut çökdü. Onda dedi: "Hə, başla!"Səhnə zarafatlarını elə edirdi ki, orada da ciddi olurdu. Sonra səhnədə bir söz deyirdi, hamı gülürdü, özü isə ciddi olurdu. Bu xüsusiyyət rəhmətlik Əliağa Ağayevdə də var idi. Çox heyf ki, böyük sənətkarlar vaxtından əvvəl dünyasını dəyişir".
Tarix
2016.01.14 / 08:15
|
Müəllif
Aytac Qədirova
|