Zəncan şəhəri ilə Türkiyənin İzmir şəhəri qardaşlaşa bilər.

Axar.az xəbər verir ki, bu barədə məlumatı ISNA agentliyi yayıb.

Məlumata görə, İrana səfər edən İzmir valisinin müavini Məhəmməd Ənsarioğlu Zəncan Ticarət Palatasının üzvləri ilə görüşüb.

Müzakirələr zamanı İran və Türkiyə Müştərək Şurasının rəis müavini Əli Yeganə Zəncan və İzmir şəhərlərinin qardaşlaşmasını təklif edib. Türkiyə nümayəndə heyətinin rəisi M.Ənsarioğlu isə irəli sürülən təklifə müsbət reaksiya verib:

“Bu məsələ ilə bağlı İzmir valisi ilə söhbət edəcəm. Ümid edirəm ki, bu barədə nəticə əldə olunacaq və müvafiq sənəd imzalanacaq”.

İzmir valisinin müavini həmçinin söz verib ki, Zəncan və İzmir iş adamlarının pul köçürmələri ilə bağlı yaşadıqları problemə də son qoyulacaq.