Feysbukun qurucusu Mark Zukerberq ikinci övladı dünyaya gəldikdən sonra 2 aylıq atalıq məzuniyyətinə çıxacağını elan edib.

Axar.az xəbər verir ki, Feysbuk səhifəsində tezliklə qızının dünyaya gələcəyini qeyd edən Zukerberq məzuniyyətinin bir ayını qızı doğulduqdan dərhal sonra, ikincisini isə dekabrda götürəcəyini bildirib:

"Tezliklə qızımız dünyaya gələcək və mən yenidən atalıq məzuniyyəti götürməyi planlaşdırıram... Əminəm ki, geri dönən zaman ofis eyni yerdə olacaq", - M.Zukerberq bildirib.

Qeyd edək ki, 33 yaşlı biznesmen, Feysbukun yaradıcısı Harvard Universitetinin ikinci kursunda təhsili ataraq biznesi ilə məşğul olub. O, 2012-ci ildə çinli Prisçilla Çhan ilə ailə qurub, 2015-ci ilin dekabr ayında ilk dəfə valideyn olub. Cütlüyün ilk qızının adı Maksimadır.