Dünya Gənc Türk Yazarlar Birliyinin Azərbaycan Respublikası Prezidenti yanında Gənclər Fondunun dəstəyi ilə başladığı “Bakıdan Türk Dünyasına” adlı layihə çərçivəsində Azərbaycanda səfərdə olan türk dünyası gənc şair, yazar və aydınları millət vəkili, siyasi elmlər doktoru Q.Paşayeva ilə görüşüb.

Axar.az xəbər verir ki, millət vəkili, Avrasiya Beynəlxalq Araşdırmalar İnstitutu İB-nin sədri Q.Paşayeva bu cür layihələrin önəminə toxunub, təşkilatçılara təşəkkürünü bildirib.

Daha sonra millət vəkili Azərbaycan Dövlət Pedaqoji Universitetdə keçirilən tədbirdə də iştirak edib. Türkiyənin bir sıra rəsmi şəxsləri, ziyalıları, KİV nümayəndələri, türk dünyasının müxtəlif bölgələrindən gəlmiş tanınmış şair, yazar, aydın və ictimai fəalların qatıldığı tədbirdə millət vəkili birlik və bərabərliyimizin nə qədər vacib və önəmli olduğundan danışıb:

“Bunun üçün isə ilk növbədə biz biri-birimizi daha yaxından tanımalıyıq, ortaq tariximizi, köklərimizi, mədəniyyətimizi, ədəbiyyatımızı, musiqimizi, keçmiş və bu günümüzü, problemlərimizi, gələcəyə baxışlarımızı gənclərimizin daha yaxşı bilməsinə çalışmalıyıq".

Bölgədə son günlər daha da gərginləşən vəziyyət barədə geniş çıxış edən millət vəkili bildirib ki, qardaşlıq yaxşı gündə də, çətin gündə də birlikdə olmaqdır.