Ana səhifə Planet |
Çexiyada keçirilən prezident seçkilərində hazırkı prezident Miloş Zeman və Elmlər Akademiyasının sabiq sədri İrji Draqoş yanvarın 26-27-də keçiriləcək səsvermənin ikinci turunda mübarizə aparacaqlar.
Axar.az xəbər verir ki, bu barədə Çexiya Statistika İdarəsi məlumat yayıb. Seçki məntəqələrinin 82,65 faizindən daxil olan məlumatlara görə, Miloş Zeman 40,4 faiz səslə liderlik edir. Onun əsas rəqibi İrji Draqoş seçicilərin 24,8 faizinin dəstəyini qazanıb. Dövlət başçısı postuna digər 7 namizəd isə 0,5 faizdən 9,1 faizə qədər səs toplayıb.
Səsvermənin yekun nəticəsi yanvarın 16-da rəsmən elan ediləcək.
Xatırladaq ki, Miloş Zeman özünün antimüsəlman baxışları ilə tanınır. O, 2015-ci ilin miqrasiya böhranını Avropaya “təşkil olunmuş müdaxilə” hesab edir. Zemanın fikrincə, müsəlmanlar Avropa ölkələrinə inteqrasiya oluna bilməzlər. O, həmçinin dəfələrlə Rusiyaya qarşı sanksiyaların ləğv olunmasına çağırışlar edib.
Draqoş isə Avropa İttifaqı ilə əməkdaşlıq və Rusiyaya qarşı sanksiyalar tərəfdarıdır. Praqanın “Aİ-də daha fəal rol oynamasını” vacib hesab edən Draqoş Çexiyanın avronu valyuta qismində qəbul etməsini dəstəkləyir.
Qeyd edək ki, Çexiyada ümumi prezident seçkiləri ikinci dəfədir ki, keçirilir.
Tarix
2018.01.13 / 22:49
|
Müəllif
Firuzə Vahidqızı
|