2018.10.16. 00:25

Səudiyyə Ərəbistanı Camal Qaşıqçının ölümünü rəsmi şəkildə etiraf etməyə hazırlaşır.

Axar.az xəbər verir ki, bu barədə məlumatı CNN yayıb. Bildirilir ki, Səudiyyə Ərəbistanı hökuməti Qaşıqçının təsadüfən sorğu zamanı öldüyünü elan edəcək.

Ər-Riyad həmçinin yayacağı açıqlamada jurnalisti ələ keçirib, gizli şəkildə ölkəyə gətirmək istədiyini, amma onu öldürmək niyyətində olmadığını bəyan edəcək. Qaşıqçı ilə bağlı hazırlanan hesabatda onun ölümünə əsas səbəb kimi, əməliyyatı həyata keçirən şəxslərin laqeydliyi göstəriləcək.

Ər-Riyad həmçinin jurnalistin ölümünə səbəb olan hər kəsi sərt şəkildə cəzalandıracağını deyəcək.

"Əl-Cəzirə" isə Türkiyə Baş Prokurorluğunun Camal Qaşıqçının Səudiyyə Ərəbistanının İstanbul Baş Konsulluğunda öldürülməsi ilə bağlı təsdiqlənmiş faktlar əldə etdiyini yazıb.