Ana səhifə Planet |
ABŞ Şimali Koreyaya qarşı nüvə şantajına son verməlidir.
Axar.az xəbər verir ki, bu barədə Şimali Koreya Xarici İşlər Nazirliyinin rəsmisi Conq Tonq Hak deyib.
O, rəsmi Pxenyanın ABŞ-la sülh danışıqları üçün müəyyən şərtləri olduğunu bildirib: "ABŞ Pxenyanı davamlı olaraq nüvə ilə şantaj edir və düşmən siyasəti aparır. Nüvə gücünə sahib döyüş gəmilərini və bombardmançı təyyarələrini yarımadaya göndərməyə davam edir.
Koreya yarımadasındakı münaqişəsinin sona çatması üçün ABŞ nüvə şantajına son qoymalı və rəsmi Pxenyanın diplomatik təklifinə cavab verməlidir".
Nazirlik rəsmisi qeyd edib ki, əgər ABŞ Şimali Koreyanın suverenliyinə hörmət edərsə və düşmən siyasətini bitirmək məsələsində ciddi olarsa, tərəflər arasındakı problemlər asanlıqla həll oluna bilər.
Qeyd edək ki, rəsmi Vaşinqton Şimali Koreya ilə münasibətlərin normallaşması üçün Pxenyandan nüvə fəaliyyətlərini və uzun mənzilli raketlərin təkmilləşdirilməsini dayandırmağı tələb edir.
Tarix
2015.11.04 / 23:01
|
Müəllif
İlham Sahiloğlu
|