Dərmanlar birmənalı qaydada həkim resepti əsasında buraxılmalıdır. İcbari tibbi sığorta olduğu təqdirdə o sığortanın hesabına həyata keçirilməlidir. Resept əsasında 14 yaşından aşağı olanlar da dərman alır, yuxarı yaş qruplarına aid olanlar da. Bu qərar nəyi dəyişir axı?

Bu sözləri Axar.az-a açıqlamasında tibb üzrə ekspert, professor Adil Qeybulla deyib. O bildirib ki, dərmanlar haqqında verilən qərarlar bir sistemdə cəmlənməlidir:

“Əslində, bu cür qərarlar ümumi səhiyyə qanununda və ya əczaçılıq haqqında qanun layihəsində öz əksini tapmalıdır. Bu, bir sistem şəklində tənzimlənməlidir. Yəni sabah bunun kimi yeni qərarlar qəbul ediləcək. Ona görə bunlar bir sistemdə, farmakalogiya və əczaçılıq haqqında qanun layihəsində cəmlənməlidir. Biz dünya analogiyalarını nəzərə almalıyıq”.

Qeyd edək ki, “Dərman vasitələri haqqında” qanuna dəyişiklik edilərək, Azərbaycanda 14 yaşı tamam olmamış şəxslərə dərman vasitələrinin verilməsi qadağan edilə bilər. Dəyişiklik layihəsi Milli Məclisin plenar iclasında müzakirəyə çıxarılacaq.