"Grand Hospital”dan sonra ölkədə daha bir məşhur özəl klinikanın adı dəyişdirilib. “Medilux” klinikası artıq “Baku Medical Plaza” kimi fəaliyyət göstərəcək.

Axar.az xəbər verir ki, bu barədə məlumatı medicina.az saytı yayıb. Məlumata görə, "Medilux” klinikası Bakıda şəbəkə formasında fəaliyyət göstərən "Baku Medical Plaza”ya satılıb.

Artıq binanın üzərində yeni klinikanın adı qeyd edilib. Lakin “Grand Hospital”dan fərqli olaraq, sözügedən klinikanın heyəti ixtisar edilməyib.

Məsələ ilə bağlı klinika hələlik heç bir rəsmi açıqlama yaymayıb.

Əldə etdiyimiz məlumata görə, Bakıxanov qəsəbəsində yerləşən “Stimul Hospital”ın da adı yaxın günlərdə dəyişdiriləcək. Klinikanın yeni adının nə olacağı hələ ki məlum deyil.

Xatırladaq ki, bir neçə gün öncə Bakının məşhur “Grand Hospital” klinikasının da adı “Ege Hospital” olaraq dəyişdirilib. Klinikanın bütün heyəti ixtisar edilərək, Türkiyədən həkimlər dəvət edilib. Klinika artıq Türkiyənin məşhur “Ege Hospital”ının Bakıdakı filialı kimi fəaliyyət göstərəcək.