Vətəndaşlarımızın orqan və toxuma transplantasiyası əməliyyatlarının ölkəmizdə aparılması üçün imkanları daha da genişləndirməliyik.

Axar.az xəbər verir ki, bu sözləri millət vəkili Qənirə Paşayeva Milli Məclisin bugünkü iclasında “Mülki dövriyyədə olmasına yol verilməyən əşyaların siyahısı haqqında” və “Mülki dövriyyənin müəyyən iştirakçılarına mənsub olan və dövriyyədə olmasına xüsusi icazə əsasında yol verilən əşyaların siyahısı” haqqında qanun layihəsinin müzakirəsi zamanı deyib. Gözün buynuz qişası toxumalarının ölkəyə gətirilməsinə icazə verilməsinin önəmini vurğulayan millət vəkili bildirib ki, bununla da bu əməliyyat üçün vətəndaşlarımız artıq xarici ölkələrə üz tutmaycaqlar.

Millət vəkili ürək və qan-damar əməliyyatları üçün vacib olan toxumaların ölkəyə gətirilməsinə icazə verilməsini də təklif edib:

“Cənab Prezidentin də Bakıda açılışında iştirak etdiyi Ürək Mərkəzində ən mürəkkəb ürək əməliyyatları yüksək səviyyədə həyata keçirilə bilər. Ürək qapağının infeksiyalaşması, endokardit, uşaqlarda bir sıra mürəkkəb ürək əməliyyatlarında istifadə olunan toxuma, homoqreft, qapaq və damarların ölkəyə gətirilməsinə icazə verilməsi çox vacibdir. Eyni məsələ oynaq toxumaları ilə də bağlıdır”.

Q.Paşayeva bildirib ki, bir sıra ölkələrdə homoqreft və toxumaların satışı rəsmi şəkildə həyata keçirilir:

“Onların rəsmi qaydada ölkəyə gətirilməsi bu istiqamətdə əməliyyatların həyata keçirilməsi üçün həyati vacibdir. Biz çalışmalıyıq ki, vətəndaşlarımız orqan və toxuma köçürülməsi üçün xaric üz tutmasın və bu əməliyyatları ölkəmizdə həyata keçirə bilsinlər. Bunun üçün də qanunvericilikdə bu istiqamətdə əlavə və dəyişiklərin edilməsinə ehtiyac var”.