Ana səhifə Siyasət |
İsrail və ərəb ölkələrinin yaxınlaşması ilk növbədə Yaxın Şərqdə öz mövqelərini gücləndirməkdə maraqlı olan Türkiyə və İran faktorları ilə əlaqədardır.
Bu sözləri Axar.az-a analitik Vüqar Zifəroğlu İsrail və Bəhreyn dövlətləri arasında olan yaxınlaşmaya münasibət bildirərkən deyib. O qeyd edib ki, Bəhreyn-İsrail münasibətləri 1994-cü ilə dayanır:
“2009-cu ildə isə İsrailin prezideni Şimon Perez və xarici işlər naziri Tzipi Livni Nyu Yorkda keçirilən dinlərarası dialoq konfransında Bəhreyn kralı ilə bir araya gəlmişdi”.
Politoloqun sözlərinə görə, İrana qarşı cəbhə açan ərəb dövlətləri İsrailə meyillənir:
“Ərəb qarşıdurması kimi də xarakterizə edə biləcəyimiz bu böhran zamanı Səudiyyə-BƏƏ-Bəhreyn üçlüyü Qətəri İranla sıx münasibətlərdə günahlandırırdı. Qətərə qarşı aktiv cəbhə açmış bu ölkələr yeni birlikdə İsraillə münasibətlərində sürətlə buzları əritməkdədir”.
Analitik vurğulayıb ki, bu fikirlər bir müddət əvvəl İsrailin baş nazirinin ərəb ölkələri ilə bağlı çıxışından sonra yaranıb:
“Benyamin Netanyahu ölkəsinin ərəb ölkələri ilə tarixin heç bir dönəmində olmadığı qədər “yaxşı münasibətlərə” sahib olduğunu açıqlamışdı. Bundan bir qədər sonra isə Bəhreyn kralı bir-birinin ardınca ərəb ölkələrinin İsraillə diplomatik əlaqələr qurmalı olduğu ilə bağlı fikirlər səsləndirməyə başladı. O zaman düşünmək olar ki, Ərəb-İsrail münasibətlərində yeniliklərə şahid ola bilərik”.
Qeyd edək ki, Bəhreyn kralı Hamad bin İsa Xəlifə ərəb ölkələrinin İsraili boykot etməsindən dolayı bezdiyini və İsraillə diplomatik əlaqələrin yaradılmasının vacibliyi ilə bağlı açıqlama verib.
Tarix
2017.09.25 / 12:29
|
Müəllif
Firuzə Vahidqızı
|