Bildiyiniz kimi, hər 10 ildən bir cəmiyyətdə IQ dəyişir. 10 il əvvələ nəzər salsaq, görərik ki, o vaxt mənzərə tam fərqli idi.

Bu sözləri tanınmış psixoloq Xatirə Səfərova gənclərin son zamanlar ailə qurmaqdan imtina etmələri haqda Axar.az-a danışarkən deyib. O, artıq hər şeyin daha əlçatan olmasını buna səbəb kimi göstərib:

“Hazırda informasiya bolluğundayıq, hər istədiyimizə rahatlıqla əlimiz çatır. Məsələn, İnstaqram səhifəsində istənilən növ kişi və ya qadın izləyicin ola bilər. Bununla da həyatdan fərqli bir yöndə zövq alarsan. Hər bir insanın gündəlik nəvaziş limiti var. Məsələn, evdən çıxanda kimsə sizi görür və “çox gözəlsiniz” - deyir. Bu da nəvazişdir. Bəziləri çox layk yığmağı sığal bilir, bəziləri bişirdiyi yeməyə tərif eşitməyi nəvaziş sayır. Hər kəs çalışır ki, nəvaziş kanalını doldursun. Əvvəllər bu limiti doldurmaq üçün arzular qurulurdu, xəyal edilirdi, lakin indi bütün xəyal və fantaziyaların oyuncaq proqramları hər kəsin telefonunda aktivdir. Məsələn, qadını, kişini gözəlləşdirən xüsusi proqramlar var. Bütün bu xəyalları beyində daşımağa artıq gərək qalmadığından arzularını proqramlarla virtual dünyaya köçürürsən. Beləliklə, insanlara istədikləri şey əlçatan olur. Bununla da gənclərin evlilik həyatı artıq onlara sıxıcı gəlir, çünki təəccüblənməkdən qorxurlar”.