Təbriz camaatı çox qonaqpərvər və mehribandırlar. Eyni adət-ənənə, eyni dil və eyni yeməklərə malikik. Mən Təbrizdə olduğum iki gündə elə bildim ki, Bakıdayam.

Kult.az xəbər verir ki, bunu Mədəniyyət və Turizm nazirinin müavini Ədalət Vəliyev Təbrizə səfəri zamanı şəhər haqqında təəssüratlarını bildirərkən deyib. Ədalət Vəliyev Təbrizdə çoxlu sayda muzeylərin olduğunu bildirib və buranı “nağıllar şəhəri” adlandırıb.

Şərqi Azərbaycan vilayətinin Mədəni Abidələri Qoruma, İncəsənət və Turist işləri üzrə İdarəsinin direktoru Murtaza Abdar isə Ədalət Vəliyevi yola salan zaman iki millətin müştərək mədəniyyət və adət-ənənəsinin Təbriz-2018-in daha yüksək səviyyədə keçirilməsinə səbəb olacağını qeyd edib. O bildirib ki, Təbriz-2018 proqramları çərçivəsində Azərbaycandan gələn turistləri Təbrizlə tanış etmək istiqamətində birgə fəaliyyət göstərəcəklər.

Vəliyev Təbrizə iki günlük səfəri zamanı Azərbaycan Tarix Muzeyi, Məşrutə muzeyi, Qacar, Göy məscid, Şairlər qəbri və həmçinin Kəndüvan tarixi kəndində olub.