Banklar tərəfindən şərtlərin ağırlaşdırılması və problemli kreditlərin həcminin artması müştərilərə verilən kreditlərin həcminin azaldılmasına gətirib çıxarıb.

Axar.az xəbər verir ki, bu sözləri iqtisadçı alim Vüqar Bayramov bankların müştərilərə verdiyi kreditin həcminin azaltmasının səbəblərini şərh edərkən deyib.

Ekspert bildirib ki, kreditlərin həcminin azaldılmasının əsas səbəbi bankların yeni kredit şərtləri müəyyənləşdirilməsi ilə bağlıdır.

“Həmçinin Mərkəzi Bank tərəfindən də bankların kredit verilməsi ilə bağlı tətbiq etdiyi qaydalar şərtləri ağırlaşdırdı. Artıq iş yerindən arayışın tələb olunması, girovun tələb olunması, vətəndaşların ödəmə qabiliyyətinin yoxlanılması kredit verilməsinin azalmasına gətirib çıxardı. Əvvəllər banklar tərəfindən vətəndaşların ödəmə qabiliyyəti yoxlanılmadan kifayət qədər böyük məbləğlər müştərilərə təklif olunurdu. Hətta bəzi kommersiya bankları çay evlərində belə plastik kartların paylanmasını həyata keçirirdi. Bu da vətəndaşların kütləvi borclanmasına gətirib çıxarırdı”.

V.Bayramov digər səbəbin verilən kreditlərin geri qaytarma faizinin aşağı düşməsi olduğunu qeyd edib:

“Statistika göstərir ki, təxminən 2.5 milyon vətəndaşın banklarda krediti var. Onların bir qismi problemli kreditlərdir. Problemli kreditlərin sayının artması kreditlərə kütləvi tələbin azalmasına gətirib çıxardı”.

Qeyd edək ki, Maliyyə Bazarlarına Nəzarət Palatası son statistikalarda banklar tərəfindən müştərilərə verilən kreditin həcminin azaldığını açıqlamışdı.