11:16

Bakıda 36 saylı marşrut avtobusu qəzaya uğrayıb.

Hadisə şahidlərinin Axar.az-a verdiyi məlumata görə, 36 saylı avtobusun aşması nəticəsində 30 nəfərə yaxın sərnişin yaralanıb. Onların içərisində ağır vəziyyətdə olanlar var.

Yaralılar Sabunçu rayon xəstəxanasına aparılır.

Sabunçu rayon xəstəxanasından Axar.az-a bildirdilər ki, qəza ilə bağlı məlumat daxil olsa da, hələlik yaralananlar xəstəxanaya gətirilməyib.

***

11:24

3 saylı Sabunçu rayon xəstəxanasından Axar.az-a verilən məlumata görə, hazırda 9 nəfər gətirilib. Onların arasında ağır vəziyyətdə olanlar var və onlar xəstəxananın reanimasiya şöbəsinə yerləşdirilib.

Xəstəxanadan həmçinin bildirilib ki, yaralıların gətirilməsi davam edir və gərginlik olduğundan, ətraflı və səhih məlumat verə bilmirlər.

***

11:42

Bakı şəhər Təcili və Təxirəsalınmaz Tibbi Yardım Stansiyasının operativ işlər üzrə şöbəsinin böyük həkimi Zemfira Vahidova APA-ya açıqlamasında deyib ki, hadisə ilə bağlı təcili yardıma bu gün səhər 10:17-də çağırış daxil olub. Onun sözlərinə görə, Qara Qarayev metrosunun yaxınlığında baş verən qəzaya 8 təcili yardım briqadası göndərilib.

Ərazidə 1 və 36 saylı marşrut avtobuslarının toqquşması nəticəsində 12 nəfər xəsarət alıb.

Onların 2-nə yerində ilkin tibbi yardım göstərilib. Digər 10 nəfər isə xəstəxanalara yerləşdirilib. Xəstəxanaya yerləşdirilənlərdən 8-i kişi, 2-si isə qadındır.

Xəsarət alanların 8 nəfəri 3 saylı şəhər klinik xəstəxanası, 2 nəfər-ana və oğulun isə alt-üst çənə sınıqları olduğu üçün Kliniki Tibbi Mərkəzə çatdırılıb.