Bu gün Milli Məclisdə ilk oxunuşda müzakirə olunası və nümayəndələrin birinci və ikinci instansiya məhkəməsində iştirakını qadağan edən qanun dəyişikliyi müzakirəyə qoyulmayacaq.

Axar.az xəbər verir ki, bu sözləri hüquqşünas Fərhad Mehdiyev “Vəkillər və vəkillik fəaliyyəti haqqında” qanuna dəyişiklik layihəsinin Milli Məclisin bu gün keçirilən plenar iclasının gündəliyindən çıxarılması barədə danışarkən deyib. O, qanun layihəsinin müzakirəsinin müvəqqəti olaraq dayandırıldığını bildirib:

“Həqiqətən də bu dəyişikliklə vəkillərin iş yükü inanılmaz dərəcədə artacaq, hüquqi xidmətin qiyməti yüksələcək, lakin keyfiyyəti azalacaq, vətəndaşların məhkəməyə çatım imkanları məhdudlaşacaqdı. Hüquqşünaslar olaraq keçirdiyimiz tədbir vasitəsilə qanun lahiyəsinin fəsadlarını ictimaiyyətə çatdırdıq. Hüquqşünasların da nəzərinə çatdırırıq ki, qanun lahiyəsinin müzakirəsinin dayandırılması müvəqqətidir. Bakalavr dərəcəsində hüquqşünasların nümayəndə qismində çıxış edə bilmələri üçün öz səylərimizi davam etdirməliyik”.

Qeyd edək ki, bundan öncə Ali Məhkəmə Milli Məclisə Prosessual Məcəlləyə, İnzibati Prosessual Məcəlləyə və Vəkillik fəaliyyəti haqqında Qanuna dəyişikliklər edilməsi haqda qanun layihəsi təklif edib. Təklif edilən layihədə bütün məhkəmə işlərində fiziki şəxslərin təmsilçiliyinin (nümayəndəliyinin) Vəkillər Kollegiyasının üzvü olan hüquqşünaslara verilməsi, Vəkillər Kollegiyasının üzvü olmayan hüquqşünasların isə məhkəmə təmsilçiliyinin ləğvi nəzərdə tutulurdu.