Millət vəkili Qənirə Paşayeva İraq Jurnalistlər İttifaqının Bağdadda təşkil etdiyi terrorla mübarizəyə dair beynəlxalq tədbirdə iştirak edib.

Axar.az xəbər verir ki, 50-yə yaxın ölkədən nümayəndələrin qatıldığı tədbirdə deputat İraq hökuməti və parlament üzvlərini Xocalı soyqırımı ilə bağlı rəsmi mövqe bildirməyə səsləyib.

Millət vəkili tədbir çərçivəsində İraqın naziri, İraq hökumətinin parlamentdəki təmsilçisi, bölgələrarası əməkdaşlıq üzrə komissarı Torhan əl-Mufti, İraqın Daxili İşlər Nazirliyinin rəhbərliyi, general Saad Maan, müdafiə naziri, Qadınlar Şurası rəhbəri, bir sıra millət vəkilləri ilə görüşdə Qarabağ problemindən danışıb.

Millət vəkili bildirib ki, İraq parlamentinin Xocalı Soyqırımı ilə bağlı rəsmi münasibət bildirməsi önəmli addım olardı.

“Azərbaycanlılar qardaş İraq parlamentindən bu istiqamətdə addımlar atılmasını, ədaləti dəstəkləməsini gözləyirlər. İraqda yaşayan türkmanlar Azərbaycanla İraq arasında möhkəm bağlardır”.