Nazir Səlim Müslümov “Təmiz Dünya” Qadınlara Yardım İctimai Birliyinin sığınacağında olub. Nazir İB-də məişət zorakılığından zərər çəkmiş şəxslərə göstərilən sosial xidmətlərlə tanış olub.

Əmək və Əhalinin Sosial Müdafiəsi nazirliyindən Axar.az-a verilən məlumata görə, nazir ölkədə sosial xidmətlər sisteminin əhatə dairəsinin getdikcə genişləndiyini vurğulayıb.

S.Müslümov qeyd edib ki, hazırda 1100 nəfərdən çox şəxsə sosial xidmət müəssisələrində stasionar şəraitdə, 11,2 min nəfər tənha ahıl və əlil şəxsə evlərində səyyar formada sosial xidmətlər göstərilir.

Nazir çıxışı zamanı bu istiqaməətdə “Təmiz Dünya” Qadınlara Yardım İctimai Birliyinin fəaliyyətini də yüksək qiymətləndirib.

Birliyin sədri Mehriban Zeynalova aparılan işlərin davamı kimi, bu il “Təmiz Dünya” Qadınlara Yardım İctimai Birliyi tərəfindən məişət zorakılığına məruz qalmış 119 qadının və 115 uşağın sığınacaqla təmin edilərək onlara zəruri yardımların göstərildiyini bildirib.