Avropa Parlamentinin 500 deputatına müraciət göndərmişik. Artıq həmin deputatlar şəxsi email ünvanıma müraciəti aldıqları və bu məsələni nəzarətdə saxlayacaqlarını bildiriblər.

Bu sözləri Axar.az-a açıqlamasında BAXCP sədrinin müavini, QHT sədri Niyaməddin Orduxanlı Avropa Parlamentinin üzvü Lars Adaktussonun Azərbaycanın işğal olunmuş Dağlıq Qarabağ regionuna qeyri-qanuni səfəri və separatçı rejimin təmsilçiləri ilə görüşməsi barədə danışarkən deyib. Onun sözlərinə görə, qeyri-hökumət təşkilatının rəhbəri kimi bu müraciət 500 deputatın hər birinin ünvanına bir-bir göndərilib:

“Məlumata görə, fevralın 27-də Lars Adaktusson və onun həmkarı Mişel Rivasi Avropa Parlamentinin binasında Dağlıq Qarabağla bağlı tədbir keçirməyi planlaşdırır. Həmin tədbir “Tufenkian Foundation”, “Armenian Legal Center for Justice and Human Rights” və “European Armenian Federation for Justice and Democracy” adlı erməni lobbi təşkilatlarının sponsorluğu ilə təşkil olunub. Fevralın 28-də isə Avropa Parlamentinin binasında AP üzvü Frank Engelin təşkilatçılığı ilə “Dağlıq Qarabağ və AB: 1988-2018” mövzusunda tədbir keçirilməsi planlaşdırılır. Bu tədbir də “The Armenian General Benevolent Union” və “European Friends of Armenia” adlı lobbi qruplarının sponsorluğu ilə həyata keçiriləcək. Deputatların hər birinin diqqətinə çatdırdıq ki, fevralın 26-da XX əsrin ən böyük faciələrindən biri olan Xocalı soyqırımının 26-cı ildönümüdür. Ondan dərhal sonra Avropa Birliyi kimi mötəbər qurumun binasında ermənilərin sponsorluğu ilə sözügedən tədbirlərin təşkili Azərbaycan xalqına və Xocalıda həlak olmuş insanların ruhuna hörmətsizlikdir. Xahiş etdim ki, AP üzvlərinin Azərbaycanın işğal olunmuş ərazilərinə səfərinə və qondarma rejimin təmsilçiləri ilə görüşünə etiraz etsinlər. Onları Dağlıq Qarabağ münaqişəsini törədənlərin sponsorluq etdiyi tədbirlərə qatılmaqdan çəkinməyə çağırdıq”.