Aşura günü ilə əlaqədar bu gün şəhərin müxtəlif yerlərində ehsanlar təşkil edilib.

Axar.az xəbər verir ki, belə ehsanlar şəhər sakinlərinin şəxsi təşəbbüsü ilə həyata keçirilib.

Belə ki, bu günlə əlaqədar olaraq, bir çox xətt üzrə hərəkət edən marşrut avtobusları pulsuz xidmət göstərib. Bu barədə avtobuslarda sürücülər özləri xüsusi elanlar da yerləşdiriblər. Aşura ilə əlaqədar əhaliyə təkcə marşrut sürücüləri deyil, əksər taksi sürücüləri də pulsuz xidmət göstərib.

Bundan başqa, küçə və parklarda, məktəblərin qarşısında, bir neçə metro stansiyasının (“Nərimanov”, “Koroğlu”, “İçərişəhər”, “Gənclik” və s.) çıxış və girişlərində, bəzi ticarət obyektlərində, bəzi yeraltı keçidlərdə ehsan süfrələri açılıb.

Hətta şəhərin mərkəzində - Nizami küçəsi və “İçərişəhər” stansiyanın qarşısındakı yeraltı keçiddə ehsan süfrəsi təşkil edilib. Aşura ilə əlaqədar yoldan keçən hər kəsə müxtəlif nemətlər, su, çay paylanılıb.

Həmçinin, əksər market və mağazalarda çörək əhaliyə havayı verilib.