Bakı Tekstil Fabriki MMC bu il məktəblilər üçün “unikal” uniforma hazırlayıb. MMC-nin hazırladığı bu məktəbli formalarını nə yumaq, nə də kimyəvi təmizləməyə vermək olar.

Axar.az xəbər verir ki, MMC bu il məktəblilər üçün hazırladığı uniformalarının üzərinə vurduğu etiket maraq doğurub. Belə ki, məktəb formalarının üzərinə vurulan etiketdə paltarlara qulluğun bir-birinə tamam zidd olan simvolları qeyd edilib.

Geyimlərin 100 faiz pambıqdan hazırlandığı qeyd edilib. Lakin bununla yanaşı, etiketə “yumaq olmaz” işarəsi də əlavə edilib. Yəni, geyimlər pambıqdan hazırlansa da, onu yumaq olmaz.

Həmçinin, MMC-nin uniformaları maşında qurutmağa da uyğun deyil.

Bundan başqa, məktəbli formasını tərkibində xlor olan ağardıcılardan istifadə ilə təmizləmək də yolverilməzdir. Ancaq etiketə həm də geyimləri kimyəvi təmizləmədə benzin, R111 kimi təmiz spirt maddələrdən istifadə edilməsinə icazə verən simvol da yerləşdirilib.

Formanın etiketindəki səhvlər bununla yekunlaşmır. Etiketdə geyimin Azərbaycan istehsalı olduğu qeyd edilib, lakin Azərbaycan sözü bütün geyimlərdə kiçik hərflə verilib – “Made in azerbaycan”.

Sosial şəbəkələrdə yayılmış foto ilə bağlı Bakı Tekstil Fabrikinin də mövqeyini öyrənməyə çalışdıq. Lakin gün ərzində etdiyimiz zənglərə BTF-dən cavab verən olmadı.