Ana səhifə Toplum |
Bakı Beynəlxalq Multikulturalizm Mərkəzində “Multikultural cəmiyyətdə dil amili” mövzusunda elmi-praktik konfrans keçirilib.
Axar.az xəbər verir ki, tədbiri giriş sözü ilə açan mərkəzin icraçı direktor əvəzi Rəvan Həsənov Azərbaycan dilinin inkişaf tarixindan bəhs edib. O qeyd edib ki, Azərbaycanın dili müxtəlif dövrlərdə “türk dili”, “tatar dili”, “Azərbaycan türkcəsi” və nəhayət, “Azərbaycan dili” adlanıb:
“Ulu öndər Heydər Əliyevin Azərbaycan xalqına bəxş etdiyi ən böyük dəyərlərdən biri də Azərbaycan dilinin qorunub saxlanılması, bu dilin məhz “Azərbaycan dili” adlanması ilə bağlıdır. Çünki dil amili Azərbaycanın müstəqilliyinin atributudur. Milli-mənəvi dəyərlərin qorunub saxlanması istiqamətində həyata keçirilən bu məqsədyönlü siyasət Heydər Əliyevin azərbaycançılıq ideyasının formalaşması yolunda göstərdiyi misilsiz xidmətlərdəndir. Bu siyasət bu gün Prezident İlham Əliyev tərəfindən davam etdirilir. Dövlət başçısının Azərbaycan dili ilə bağlı son sərəncam və fərmanları bir daha onu göstərir ki, Azərbaycan dili qloballaşma şəraitində dünya dilləri arasında öz yerini tutmalıdır”.
Prezident Administrasiyasının millətlərarası münasibətlər, multikulturalizm və dini məsələlər üzrə şöbəsinin baş məsləhətçisi Müzəffər Talıblı Azərbaycan dilinin tarixən Qafqaz və Yaxın Şərqdə xalqlar arasında ünsiyyət vasitəsi rolunu oynadığını bildirib:
“Bu gün Azərbaycan dilində 50 milyondan çox insan danışır. Azərbaycan dili dünya dillərinin içində özünəməxsus yeri olan, inkişaf etmiş və bugünkü səviyyədə siyasət, diplomatiya, elmi, ədəbi dil kimi formalaşıb. 70-ci illərdə Azərbaycan dilinin Konstitusiyaya dövlət dili statusu ilə daxil edilməsi o dövrün basqıları, qadağaları fonunda son dərəcə böyük tarixi və siyasi hadisə idi. Hər bir Azərbaycan vətəndaşı dilimizi birmənalı olaraq qorumalıdır. Milliyyətindən, etnik, dini mənsubiyyətindən asılı olmayaraq,Azərbaycan vətəndaşının dilini bilməməsi özünü cəmiyyətdən təcrid etmək deməkdir”.
Tədbirdə AMEA-nın Dilçilik İnstitutunun direktoru, akademik Möhsün Nağısoylu, ADU-nun Azərbaycan dilçiliyi kafedrasının müdiri, professor Adil Babayev, Alban-Udi Xristian dini icmasının sədri Robert Mobili, “Multikulturalizm” jurnalının baş redaktoru Fəxri Uğurlu, Yaradıcılıq Fondunun aparat rəhbəri Qismət Rüstəmov, BBMM-in şöbə müdiri Yadigar Məmmədli və digərləri də çıxış ediblər.
Onlar çıxışlarında müsəlman türk dövlətlərinin Azərbaycanın keçdiyi yolu davam etdirdiyini vurğulayıblar.
Tarix
2018.11.15 / 15:02
|
Müəllif
Aygün Yusibova
|