Cari il yanvarın 1-dən fevralın 6-dək paytaxtda 52 yol-nəqliyyat hadisəsi qeydə alınıb.

Bakı Şəhər Baş Polis İdarəsinin Dövlət Yol Polis İdarəsinin ictimai əlaqələr bölməsinin rəisi, polis polkovniki Vaqif Əsədov AzərTac-a bildirib ki, bu qəzalar nəticəsində 10 nəfər ölüb, 56 nəfər müxtəlif dərəcəli bədən xəsarətləri alıb. Ötən ilin eyni dövrü ilə müqayisədə hadisələr 36, ölüm və xəsarət halları isə müvafiq olaraq 15 və 35 fakt azalıb. Paytaxt yollarında hərəkətin təhlükəsizliyinin təmin olunması məqsədilə yol polisi əməkdaşlarının keçirdikləri məqsədyönlü tədbirlər, apardıqları təbliğat işinin nəticəsində ötən illə müqayisədə Bakıda baş verən yol-nəqliyyat hadisələrinin ümumi təsnifatında azalma qeydə alınıb. Hadisələr əsasən sürət həddinin aşılması, piyadaların vurulması, ötmə və manevretmə, yol ayrıclarını keçmə qaydalarının pozulması ilə bağlı olub.

Bakı Şəhər Baş Polis İdarəsi Dövlət Yol Polisi İdarəsi sürücüləri yol hərəkəti qaydalarına əməl etməyə, bütün hərəkət iştirakçılarını qanunun tələblərinə hörmətlə yanaşmağa çağırır.