Fars dilində çox sayda türk sözü var. Məsələn, “Q” hərfi olan əksər sözlər türk sözüdür. Fars dilində ümumiyyətlə “Q” hərfi yoxdur. Misal üçün, qəşəng, qırmızı, qab, boşqab, yaylaq, qışlaq və s. kimi sözlər hamısı türk dilinə aiddir. Ona görə də təmiz fars dilində danışmağa çalışmaq yanlış bir təsəvvürdür.

Axar.az xəbər verir ki, bu barədə Tehran Universitetinin müəllimi İsmayıl Əmini “Cavan” radiosunda çıxışı zamanı deyib. O bildirib ki, əhali arasında danışılan fars dili universitet mühitində və mütəxəssislər arasında heç bir işə yaramır:

“Düşünün ki, biri universitet müəllimidir. Şübhəsiz ki, onun fars sözlərindən başqa, bir çox sözlərə ehtiyacı var. Məsələn, tibb üzrə mütəxəssis üçün də xüsusi sözlər gərəkir, hansı ki, fars dilində yoxdur. Fars Dili və Ədəbiyyatı Mədəniyyət Evi türk, ərəb və ingilis sözlərini əvəz edən farsca yeni sözlər yaratmalıdır. Bu sözlər əvvəlcə çətin qəbul olunsa da, sonra əhali arasında öz yerini tapacaq”.

İsmayıl Əmini fars dilinə digər dillərdən çox sayda sözün daxil olmasını bu dilin yeni sözlərə olan ehtiyacı ilə izah edib.