Dünya praktikasında buktreylerlər artıq öz yerini tapmış incəsənət növünə çevrilir. Ölkəmizdə də bu festivalın keçirilməsini 2014-cü ildən düşünməyə başladım. Sadəcə, qismət bu ilə imiş.

Bu sözləri Axar.az-a kinoaktyor Ruslan Sabirli Azərbaycanda İlk Buktreyler Festivalının keçirilməsi təşəbbüsündən danışarkən deyib.

O, festivalın məqsədinin Azərbaycanda kitaba və mütaliəyə marağın oyadılması, kino sahəsində yeni istedadların üzə çıxarılması və həmçinin kitab biznesinə dəstək olduğunu bildirib:

"Öz təklifimlə cənab nazir Əbulfəs Qarayevə müraciət etdim. O da öz növbəsində ideyanı çox bəyəndi. Beləliklə, nazirin cəmiyyətimiz üçün faydalı işlərə həssas yanaşmasının şahidi oldum. Bu məni çox sevindirdi. Cənab nazirdən bu reaksiyanı gördüyüm üçün çox şadam. Nazir müşavirədə qaliblərə pul mükafatlarının verilməsi ideyasını irəli sürdü, bu isə mənimçün gözlənilməz idi".

Münsiflər heyəti neçə nəfərlik olacaq və onlar kimlərdir?

5 nəfərlik münsiflər heyəti nəzərdə tutulub. Obyektivliyin qorunması üçün onların adlarını hələ ki açıqlamırıq.

"Festival hər il keçiriləcəkmi" sualına isə ideya rəhbəri belə cavab verib:

"Bəli, festivalın hər il keçiriləcəyi nəzərdə tutulur. Bu arada onu da deyim ki, mənim üçün gözlənilməz olanlardan biri də festivalda İtaliya və Belarusiyadan buktreylerlərin göndərilməsi olub.

Buktreylerlərə qoyulan tələblər və iştirak şərtlərinə gəlincə, bütün bunlar barədə www.booktrailer.az saytından ətraflı məlumat ala bilərlər. Bacarığı olan hər kəsi bu festivalda iştirak etməyə çağırıram".

Qeyd edək ki, Buktreyler – kitabın məzmununu vizuallaşdırmaqla oxucular arasında təbliğinə istiqamətlənmiş, onun ən parlaq və tanınan anlarını özündə əks etdirən video çarx və ya kitabın məzmunundan bəhs edən qısametrajlı filmdir.

Festivalın şərtlərinə görə, birinci yerin qalibini 1000, ikinci yer (2 ədəd) - 800, üçüncü yerin (üç ədəd) qaliblərini isə 500 manat mükafat gözləyir.