2024-cü il üçün Türkiyənin ən böyük gəlir vergi ödəyiciləri siyahısına “Baykar” şirkətinin baş direktoru Səlcuq Bayraqdar başçılıq edir.

Axar.az xəbər verir ki, S.Bayraqdar ötən il dövlət xəzinəsinə 2 milyard 767 milyon 587 min lirə vergi ödəyib.

Reytinqdə ikinci yerdə dövlətə 2 milyard 528 milyon 619 min lirə vergi köçürən “Baykar”ın digər təmsilçisi Haluk Bayraqdar qərarlaşıb.

Türkiyə Gəlirlər Təşkilatının məlumatına görə, Səlcuq və Haluk Bayraqdar dördüncü ildir ki, ən böyük gəlir vergisi ödəyiciləri siyahısına başçılıq edirlər.

Qeyd edək ki, “Baykar” şirkətinin ötən il müdafiə ixracının həcmi 1,8 milyard dollara çatıb. Aparıcı PUA istehsalçısı Türkiyənin bütün müdafiə və aviasiya sektoru ixracatının dörddəbirini həyata keçirir.