Robert Köçəryan agent idi. Belə bir fakt da deyim ki, o, bunun üçün xüsusi hazırlıq keçmişdi.

Axar.az xəbər verir ki, bunu İctimai Televiziyanın efirində yayımlanan "Təmas xətti" verilişində Azərbaycanın sabiq xarici işlər naziri Tofiq Zülfüqarov deyib.

O, Azərbaycan və Ermənistan nümayəndə heyətlərinin Ukraynada təşkil olunmuş qeyri-rəsmi görüşündən danışıb:

"Onda Köçəryan birdən yada salmağa başladı ki, o, vaxtilə üzgüçülüklə məşğul olub, tez-tez Qara dənizdə üzürmüş. Ondan soruşublar ki, nə əcəb Qara dəniz? Səbəb də bu imiş ki, orada su altında xüsusi təşkil olunmuş kurslar olub. Diversant kimi müxtəlif hazırlıq növlərinə cəlb olunub. O, hətta kitabında da yazıb ki, Qarabağda hadisələr başlayanda artıq komsomolun iclaslarında yox, digər insanlarla görüşürdü. Xankəndidə xüsusi təşkilat komitəsi var idi. Müxtəlif yerlərdən gələn milis, KQB işçilərinin bir qismi guya günorta üsyanı yatırmaq üçün gəlmişdilər, axşamlar isə Köçəryanla, Quqasyanla görüşürlərmiş. Bunu Köçəryan özü yazır. Yəni ehtiyatda olan hazırlıqlı agent olub".

"Ter-Petrosyanın da parlaq keçmişi olmayıb. Onun atası Suriyada kommunist partiyasının təşkilatçılarından biri idi. Yəni biz bilməliyik ki, onların siyasi elitası çox güclü şəkildə Rusiyanın təsiri altında idi", - deyə sabiq nazir əlavə edib.

Mövzu ilə bağlı daha ətraflı videomaterialı təqdim edirik: