Ermənistanın Baş naziri Nikol Paşinyan ölkəsinin uzunmüddətli təhlükəsizlik əməkdaşlığı və üç illik “Qartal tərəfdaşı” təlimləri çərçivəsində ABŞ-dan müasir “V-BAT” PUA-ları əldə etdiyini bildirib.

Axar.az xəbər verir ki, “Shield Aİ” (“Süni intellektlə işləyən Qalxan”) şirkəti tərəfindən istehsal olunan V-BAT PUA-ları şaquli qalxma və enmə imkanlarına malik kəşfiyyat təyinatlı pilotsuz uçuş aparatıdır.

V-BAT Qara dəniz, Karib dənizi və Yaxın Şərq də daxil olmaqla, bir çox bölgədə əməliyyat məqsədilə yerləşdirilib. Ukraynada isə elektron müharibə (EW) hücumlarına tab gətirə bilib.

V-BAT-ın təkmühərrikli kanallı ventilyatoru ona məhdud məkanlarda şaquli olaraq qalxıb-enmə etməyə, həmçinin asılı vəziyyətdən üfüqi uçuş rejiminə keçməsinə imkan verir. Sistem “Shield Aİ” şirkətinin “Hivemind” (“Arı zehni”) adlı avtonom proqram təminatı ilə işləyir. Proqram vizual odometriya əsasında naviqasiya imkanlarına malikdir. Bu da GPS və rabitə siqnallarının olmadığı mühitlərdə fəaliyyət göstərməyə imkan yaradır.

Kompakt dizaynı və havada qalma qabiliyyəti onu gəmi əməliyyatları və məhdud quru əraziləri üçün uyğun edir. Maksimal sürəti 90 km/saat, uçuş müddəti isə 13 saatdan çoxdur.

Hazırda sözügedən PUA-lardan Braziliya, İndoneziya, Yaponiya, Niderland, ABŞ və Yunanıstan istifadə edir.

Qeyd edək ki, Vikipediya artıq “gələcək istifadəçilər” siyahısına Hindistanla yanaşı, Ermənistanın da adını əlavə edib.