Ana səhifə Gündəm |
61, 62, 64 və 65-ci hökumətlərdə daxili işlər naziri vəzifəsini tutan Əfqan Ala dünən sürpriz şəkildə istefa verəndən sonra müxtəlif yozumlar meydana çıxıb.
Axar.az xəbər verir ki, 3 ildir iqtidarın ən mühüm vəzifələrindən birini tutan Alanın istefası ilə bağlı Türkiyə mətbuatında müxtəlif versiyalar irəli sürülür. Bəziləri 17-25 dekabr hadisələrində Alanın 81 vilayət polis idarəsindən 74-nün, 7 min kəşfiyyatçıdan 6.500-nün FETÖ üzvü olduğunu açıqlamasının hakimiyyət dairələrində narahatlıq yaratdığını iddia edir.
Ayrıca, 15 iyul dövlət çevrilişinə cəhd zamanı prezident və baş nazir uzun müddət Əfqan Ala ilə əlaqə yarada bilməmişdi. Ala isə həmin vaxt Ərzurumdan təyyarə ilə Ankaraya gəldiyini iddia etmişdi.
Qeyd edək ki, Əfqan Alanın istefa qərarı Prezident Rəcəb Tayyib Ərdoğanla Baş nazir Binəli Yıldırım arasında baş tutan 25 dəqiqəlik görüşdən sonra məlum olub. Yıldırım 1 dəqiqəlik açıqlamasında təyinatlar barədə məlumat verib.
"Daxili işlər nazirimiz, Bursadan seçilən millət vəkilimiz Əfqan Alanın istefası ilə boş qalan vəzifəyə Məşğulluq naziri, Trabzondan seçilmiş millət vəkili Süleyman Soylu, onun yerinə isə Bursadan millət vəkili olan Məhməd Müəzzinoğlu seçilib. Vəzifəsini tərk edən Əfqan Alaya xidmətlərinə görə təşəkkür, yeni nazirlərimizə uğurlar arzu edirəm".
Bu açıqlamadan öncə, Ərdoğanın dünən Soylu və Müəzzinoğlu ilə ayrı-ayrılqıda, ictimaiyyətə açıqlanmayan görüşü keçirilib. Bu görüşdən sonra Əfqan Ala Təhsil Nazirliyində yüksək vəzifə tutan qardaşı Atif Ala ilə danışaraq istefa verəcəyini deyib.
Tarix
2016.09.01 / 11:33
|
Müəllif
Hacı Qulu
|