1974-cü ildə incəsənət universitetinə daxil oldum, bir il oxudum. Həmin ilin yay aylarında Hamlet gəlmişdi. Əmilərim onunla söhbət edəndə soruşdular nə iş görürsən? O da dedi, Əlisəttar Atakişiyev bir film çəkir: "Qərib cinlər diyarında".

Axar.az xəbər verir ki, bunu "Qərib cinlər diyarında" filmində baş rolu canlandıran Bəxtiyar Xanızadə filmdə Qərib obrazına necə seçildiyi haqda ARB TV-də yayımlanan "Ömrün fəsilləri" verilişində danışarkən deyib. O, film rejissorlarının onu məcburən seçdiklərini bildirib:

"Əmilərim maraqlandı ki, mövzu nədir? O da danışdı. Amma dedi ki, problemimiz var. Film çəkilir, di gəl Qəribi hələ tapmayıblar. Onda əmim dedi ki, Bəxtiyar oxuyur da birinci kursda. Apar onu, qoy çəkilsin. Hamlet də mənə dedi ki, sabah gəl kinostudiyaya.

Səhər kinostudiyaya getdim. Qapıda özümü təqdim elədim. İkinci rejissor Əşrəf Mamayev endi aşağı və dedi ki, zəhmət çəkib gəlmisən, ancaq artıq lazım deyilsən, bir nəfəri tapmışıq, get evə. Mən də gəldim evə. Üstündən iki gün keçdi. Dənizə getməyə hazırlaşanda qapıda qara "Volqa" dayandı. Dedi "Bəxtiyar burada yaşayır?". Dedim, mənəm. Dedi ki, min maşına. "Hara? –Kinostudiyaya". Mindirdilər maşına, gəldik kinostudiyaya. Əvvəlcə saldılar kostyum, daha sonra qrim otağına və beləliklə birinci çəkiliş başladı.

Tapdıqları adamda hansısa texniki səhv olub və onu bəyənməyiblər. Onda deyiblər ki, ya filmi təhvil ver, ya da aktyor tap, sabah çəkilişlərə başla. Beləcə, məni məcburi şəkildə o film üçün seçdilər".

Qeyd edək ki, "Qərib cinlər diyarında" filmi 1974-cü ildə çəkilib, 1977-ci ildə isə ekrana buraxılıb. Filmin rejissoru Əlisəttar Atakişiyevdir. Sözügedən filmdə baş rolun ifaçısı - Qərib obrazını canlandıran Azərbaycanın xalq artisti Bəxtiyar Xanızadə Azərbaycanın əməkdar artisti Hamlet Xanızadənin qardaşı oğludur.