Türkiyədə martın 30-da keçirilən bələdiyyə seçkilərində saxtakarlığa yol verildiyi ilə bağlı ittihamlar səslənməyə başlayıb.

"Axar.az" xəbər verir ki, səslərin sayılması zamanı işıqların söndürülməsinə görə yaranan şübhələrin ardınca indi də bülletenlərin yandırılması və səslər sayılarkən yekun protokolda düzgün qeyd aparılmamasını əks etdirən fotolar yayılıb.

Sosial şəbəkədə paylaşılan və müzakirələrə səbəb olan fotoda isə bir neçə seçki məntəqəsində bələdiyyə seçkilərinin açıq şəkildə hakim partiya təmsilçisinin xeyrinə saxtalaşdırıldığı öz əksini tapıb.

Xatırladaq ki, Türkiyədə "seçkilərin saxtalaşdırılması" ilə bağlı ittiham demək olar ki, heç zaman səslənmir və bu fotofaktların da anti-təbliğat vasitəsi kimi quraşdırıldığı və sosial şəbəkələrdə yerləşdirildiyi istisna deyil. Çünki hələlik əsas müxalifət partiyaları bununla bağlı ittihamlar səsləndirməyiblər. Amma hazırda yekun protokolların müəyyən dairə və məntəqələrdə düzgün hazırlanmaması şübhəsinə görə Türkiyənin bəzi seçki dairələrində səslərin yenidən sayılmasına qərar verilib.