İyulun 4-də Ermənistan silahlı qüvvələrinin Azərbaycanın Füzuli rayonunun Alxanlı kəndinin mülki əhalisini atəşə tutması, Quliyeva Sahibə və onun iki yaşlı nəvəsi Quliyeva Zəhranın həlak olması barədə Avropa Azərbaycan Cəmiyyətinin sorğusuna Böyük Britaniya Parlamentinin üzvləri - Lord Kilkluney, Baronessa Zahidə Mənsur, Mark Menzies münasibət bildiriblər.

Axar.az xəbər verir ki, Lord Kilkluney Alxanlı olayını sərt şəkildə tənqid edərək bunları deyib:

“Mən regionda dəfələrlə səfərdə olmuşam və münaqişənin həll yolunun diplomatik ola biləcəyindən əminəm. Təmas xəttində baş verən istənilən insan tələfatı təəssüf hissi doğurur. Lakin iki insanın ölümü ilə nəticələnən dinc sakinlərin qəsdən hədəfə alınması mənfur hərəkətdir”.

Baronessa Zahidə Mənsur istənilən insan tələfatının faciə olduğunu, azyaşlı uşağın qətlə yetirilməsinin isə dözülməz olduğunu bildirib.

Mark Menzies ermənilərin regionda sülh danışıqlarını pozduğunu vurğulayıb:

“Regionda yaşayan insanların böyük əksəriyyəti münaqişənin sülh yolu ilə həllini istəyir. İki yaşlı uşağın və onun nənəsinin qətlə yetirilməsi sülh danışıqların pozulmasına yönəlmiş bir addımdır”.