Qarabağ məsələsində hər zaman Azərbaycanın yanındayıq və olacağıq.

Axar.az xəbər verir ki, bu sözləri millət vəkili Qənirə Paşayeva ilə görüşündə Türkiyə Böyük Böyük Millət Məclisinin başqanı İsmail Qəhrəman deyib.

Millət vəkili Q.Paşayeva Türkiyənin Aksaray vilayətində Türkiyə Böyük Millət Məclisinin sədri İsmail Qəhrəmanla görüşüb. Birlik Vəqfinin Aksaray şöbəsinin açılışı çərçivəsində keçirilən görüş zamanı İsmayıl Qəhrəman deyib: “Hər zaman Azərbaycanın yanındayıq, Qarabağ problemi bizim də problemimizdir. Dünyanın gözü önündə böyük haqsızlıq edilir. Ortada bir işğal var. Azərbaycan torpaqları işğal olunub və təəssüf ki, bu işğal davam edir. Biz hər zaman Qarabağ məsələsində Azərbaycanın yanındayıq və yanında olacağıq”.
Q.Paşayeva bildirib ki, biz də hər zaman qardaş Türkiyənin yanındayıq: "Çünki Azərbaycanımızla yanaşı, qardaş Türkiyə də bizim üçün Vətəndir. Sevinciniz sevincimiz, kədəriniz kədərimizdir. Hər zaman Azərbaycanla bərabər Türkiyənin də güclənməsini istəyir və dua edirik. Çünki biz birlikdə bu çoğrafiyada üzüntü, kədər içində yaşayan, müxtəlif dövlətlərin ərazisində yaşayan milyonlarla qardaş-bacılarımız üçün ümid, pənah qapısıyıq.

Görüş zamanı millət vəkili Q.Paşayeva Türkiyə Böyük Millət Məclisinin sədri İsmayıl Qəhrəmana üzərində Qarabağ mötivləri olan qalstuk və “Qarabağ hekayələri” kitabını hədiyyə edib, Aksaraya Qarabağ Parkı və Xarıbülbül abidəsinin açılışında iştirak etmək üçün gəldiyini bildirib və Akşəhər bələdiyyəsinə təşəkkür edib.
İsmail Qəhrəman Türkiyənin müxtəlif bölgələrində Qarabağ parkları və abidələrinin açılmasının çox önəmli olduğunu xüsusi vurğulayıb.