Qəbələ şəhərində Fövqəladə Hallar Nazirliyinin təşkilatçılığı, Təhsil və Gənclər və İdman nazirliklərinin dəstəyi ilə Ümummilli lider Heydər Əliyevin anadan olmasının 91-ci ildönümünə həsr edilmiş "Gənc xilasedici və yanğınsöndürən" III Ümumrespublika birinciliyi və "Gənc xilasedici" II Beynəlxalq yarışlarına yekun vurulub.

Axar.az Fövqəladə Hallar Nazirliyinin rəsmi saytına istinadən xəbər verir ki, yekun tədbirlərində Azərbaycan Respublikasının Fövqəladə Hallar naziri, general-polkovnik Kəmaləddin Heydərov, Təhsil naziri Mikayıl Cabbarov və Gənclər və İdman nazirinin müavini İsmayıl İsmayılov iştirak ediblər.

Yekun tədbirləri Qəbələ Atıcılıq Klubunun ərasizində gənc xilasedicilərin nümunəvi təlim çıxışları ilə başlayıb.

FHN Fövqəladə Halların Xəbərdar Edilməsi Baş İdarəsinin rəisi, general-mayor Elşad Hüseynov nazir, general-polkovnik Kəmaləddin Heydərova raport verib.

Nümunəvi təlim çıxışlarında Azərbaycan, Türkiyə, Rusiya, Qazaxıstan, Qırğızıstan, Gürcüstan və Belarusdan olan təmsilçilər, həmçinin respublika birinciliyi uğrunda yarışların qalibi olmuş rayonlarımızın komandaları iştirak ediblər. Komandalar "Axtarış-xilasetmə işi" üzrə kinoloqların dəstəyi ilə əməliyyatları nümayiş etdiriblər.

Sonra nazirlər Kəmaləddin Heydərov və Mikayıl Cabbarov "dəyirmi masa" tədbirində müxtəlif ölkələrdən gəlmiş gənc xilasedicilərin suallarını cavablandırıblar. Onlar bildiriblər ki, belə yarışların keçirilməsi gənclərin fövqəladə hallara qarşı mübarizədə təcrübə əldə etmələrinə geniş imkanlar açacaq. Türkiyəli, rusiyalı, qazaxıstanlı, qırğızıstanlı, gürcüstanlı və belaruslu gənc xilasedicilər bu cür yüksək səviyyəli tədbirin keçirilməsi üçün Azərbaycan Fövqəladə Halar nazirinə təşəkkürünü bildiriblər.

Yarış iştirakçılarının mükafatlandırılması mərasimi Qəbələ Mədəniyyət Sarayında keçirilib.

Mərasim gənc xilasedicilərin səhhnələşdirdikləri və iştirak etdikləri təbii və texnogen mənşəli fövqəladə halara dair kompozisiya ilə başlayıb. Yarışlar haqqında Azərbaycan FHN-nin hazırladığı video-çarx da nümayiş etdirilib.

Qonaq ölkələrin komandalarının milli rəqs və mahnılarını ifa etməsi mərasimə xüsusi rəng qatıb.

Sonda nazirlər Kəmaləddin Heydərov, Mikayıl Cabbarov və gənclər və idman nazirinin müavini İsmayıl İsmayılov qalib komandalara mükafatları təqdim ediblər. Onlara fəxri fərman və qiymətli hədiyyələr təqdim edilib.

Nazir Kəmaləddin Heydərov ümumrespublika yarışlarının qalibi Siyəzən rayonu komandasına və beynəlxalq yarışların iştirakçısı olan Türkiyə, Gürcüstan, Belarus, Qazaxıstan, Rusiya və Qırğızıstan komandalarına mükafatları təqdim edib.

Beynəlxalq yarışlarda birinci yeri Rusiya Federasiyası, ikinci yeri isə Azərbaycan komandaları tutublar. Nazir Kəmaləddin Heydərov gənc xilasedicilərə uğurlar diləyib.