Bu gün Amsterdamda Azərbaycanın ən böyük diaspor təşkilatlarından olan Avropa Azərbaycanlıları Konqresinin (növbədənkənar) VI Qurultayı və Xocalı soyqırımının 26-cı ildönümünə həsr edilmiş mərasimlərə start verilib.

Axar.az xəbər verir ki, hazırda Amsterdam şəhərində “De Rode Hoed (The Red Hat)” Mərkəzində simfonik orkestrın iştirakı ilə Xocalı soyqırımının 26-cı ildönümünə həsr edilmiş rekviyem davam edir.

Axşam saatlarında baş tutan prorqam Azərbaycan Respublikasının dövlət himninin oxunması ilə başlanıb. Daha sonra Heydər Əliyev Fondunun “Xocalıya Ədalət” Beynəlxalq Məlumatlandırma Kampaniyası çərçivəsində hazırlanmış qısa filmin təqdimatı keçirilib. Tədbirdə həmçinin Vyana Konservatoriyasının tələbəsi Onidia Danger də Azərbaycanla bağlı öz fikirlərini bölüşüb.

Anım tədbiri Azərbaycan və dünya klassikasına aid olan həzin musiqi ifalarının müşayiəti ilə keçirilir.

Qeyd edək ki, təbdirdə Azərbaycan Prezidentinin köməkçisi Əli Həsənov, Disporla İş üzrə Dövlət Komitəsinin sədri Nazim İbrahimov, xalq şairi Sabir Rüstəmxanlı, Azəri-türk Qadınlar Birliyinin rəhbəri Tənzilə Rüstəmxanlı, Avropa Azərbaycanlıları Konqresinin sədri Sahil Qasımov, AAK-ın vitse-prezidenti, iş adamı Füzuli Məmmədov, o cümlədən, ölkənin aparıcı media qurumları - “Yeni Müsavat” Media Qrupunun rəhbəri Rauf Arifoğlu, “Teleqraf” Media Qrupunun rəhbəri Aynur Camalqızı, APA Holdinqin prezidenti Vüsalə Mahirqızı, Report İnformasiya agentliyinin baş redaktoru Murad Əliyev, "Haqqin.az" və "Virtualaz.org" saytlarının rəhbəri Eynulla Fətullayev və s. iştirak edir.

Sabah isə qurultayın açılışı olacaq. Əvvəlcə, Avropa Azərbaycanlıları Konqresinin İdarə Heyətinin hesabatı dinləniləcək. Mandat komissiyasının məlumatından sonra Avropa Azərbaycanlıları Konqresinin rəhbər orqanlarının yeni tərkibi formalaşdırılacaq.

Panel müzakirələrində Azərbaycan Respublikası Prezidentinin "2018-ci ilin Azərbaycan Respublikasında “Azərbaycan Xalq Cümhuriyyəti İli” elan edilməsi haqqında" Sərəncamına uyğun olaraq Avropa ölkələrində Azərbaycan Xalq Cümhuriyyətinin yüz illiyinin qeyd edilməsi ilə əlaqədar Avropa Azərbaycanlıları Konqresinin Tədbirlər Planı layihəsinin müzakirəsi keçiriləcək.

İkinci paneldə "1918-ci il azərbaycanlıların soyqırımının 100 illiyi haqqında" Azərbaycan Respublikası Prezidentinin Sərəncamına uyğun olaraq Avropa ölkələrində 1918-ci il 31 mart azərbaycanlıların soyqırımının yüzilliyinin qeyd edilməsi ilə əlaqədar Avropa Azərbaycanlıları Konqresinin Tədbirlər Planı layihəsi müzakirəyə çıxarılacaq.

"Azərbaycan diaporu və Azərbaycan mediası: əməkdaşlıq səviyyəsi, problemlər və onların həlli yolları" (KİV və diapor təşkilatları rəhbərlərinin iştirakı ilə) adı ilə keçiriləcək digər panel jurnalist Azər Həsrətin moderatorluğu ilə baş tutacaq.

Daha sonra Avropa Azərbaycanlıları Konqresinin Nizamnaməsinə əlavə və dəyişikliklər, Аvropa Azərbaycanlıları Konqresinin 2018-2021-ci illər üçün fəaliyyət proqramı qəbul ediləcək.

Qurultay həmçinin Xocalı soyqırımı ilə bağlı bəyanat verəcək, “Metsamor” Atom Elektrik Stansiyası ilə əlaqədar beynəlxalq təşkilatlara müraciət edəcək.