"Rusiyaya tətbiq edilən sanksiyalar Azərbaycana təsirsiz ötüşməyəcək".

Bu sözləri Axar.az-a iqtisadçı ekspert Samir Əliyev Rusiyaya tətbiq edilən sanksiyaların Azərbaycana təsirinə münasibət bildirərkən söyləyib.

Rusiyaya tətbiq edilən sanksiyaların Azərbaycana ciddi təsirindən danışan ekspert, buna görə hələlik ən böyük zərbənin Neft fonduna dəyəcəyini bildirib:

"Rusiyaya tətbiq edilən sanksiyaların Azərbaycana təsiri bir neçə istiqamətdə mövcuddur. Birincisi, Azərbaycanın valyuta ehtiyatlarının azalmasıdır. Yəni neft fondu istiqamətində olan təsiri nəzərdə tuturam. Çünki biz bilirik ki, neft fondunun valyuta ehtiyatlarına hardasa 500 milyonluq rubl yerləşdirilib. Əgər rus rublu 10% ucuzlaşıbsa, deməli, 500 milyon dollar rubl ən azı 10% dəyərini itirib. İkincisi ondan ibarətdir ki, Neft fondu VTB bankının səhmlərini alıb. Həmin bankın da səhmləri əhəmiyyətli dərəcədə ucuzlaşıb. Yəni Rusiyaya tətbiq edilən sanksiyaların bir istiqamətinin zərəri neft fondu istiqamətində, valyuta ehtiyatlarının azalmasıdır. İkinci istiqamət - biz bilirik ki, orada iki milyondan çox soydaşımız işləyir. Bu da Azərbaycanda, xüsusilə regionda yaşayan ailələrin sosial vəziyyətinin pisləşməsinə gətirib çıxaracaq. Digər tərəfdən də Rusiyanın kənd təsərrüfatı məhsullarına tətbiq edilən sanksiya nəticəsində Azərbaycan məhsullarının bu ölkəyə axması bazarlarımızda qiyməti bahalaşdıra bilər. Bu, Rusiyaya tətbiq edilən sanksiyaların Azərbaycana olan ilkin təsiridir və getdikcə sanksiyalar daha da dərinləşdikcə Rusiyanın digər sahələrinə də ciddi təsir göstərəcək".