"Diqqətli olun, bizim səhvləri təkrarlamayın".

Bu sözləri politoloq Elxan Şahinoğlu Ukraynada baş verən hadisələri şərh edərkən deyib. Axar.az xəbər verir ki, politoloq hazırda Ukraynada baş verən hadisələri 1990-cı illərin əvvəlindəki Azərbaycanla müqayisə edib:

"Bu il iki dəfə Ukraynada oldum, ukraynalı dostlarıma eyni sözü deyirdim: "Diqqətli olun, bizim səhvləri təkrarlamayın". Təəssüf ki, təkrarladılar. Bizim hərbi birliklər 1993-cü ildə Xankəndinin iki addımlığına çatmışdılar. Necə ki, Ukrayna ordusu təxminən iki həftə əvvəl Donetsk və Luqanskı mühasirəyə almışdı. Sonra nə baş verdi? Orduda xəyanət, rusların erməni separatçılarına texnika və canlı qüvvə ilə dəstəyi əks-hücumla Qarabağ və ətrafının işğalına yol açdı. Eyni ilə Ukrayna ordusundakı xəyanət, bəzi qüvvələrin cəbhə bölgəsini özbaşına tərk etməsi və rusların bu dəfə ukraynalı separatçılara dəstəyi Ukrayna ordusunu geri çəkdi, ələ keçirilən mövqelər yenidən itirildi. Buna görə deyirdim ki, Rusiya Ukraynada "ikinci Qarabağ" yaradır..."