AYB-nin Güney Azərbaycan Komissiyasının növbəti görüşündə idarə heyətinin və komissiyanın üzvləri bir araya gəldilər.

Kult.az xəbər verir ki, görüşdə Güney Azərbaycanda baş verən son hadisələr, mövcud durum, ədəbi-bədii mühitdə gedən proseslər və milli-mədəni həyatın aktual məsələləri ətrafında geniş fikir mübadiləsi aparılıb.

Komissiyanın sədri, xalq şairi Sabir Rüstəmxanlı, güneylii şair-jurnalist Məsud Haray, tərcüməçi Yədulla Kənani, idarə heyətinin üzvləri - araşdırmaçı Pərvanə Məmmədli, şair Həmid Herisçi çıxış edərək Güneyin bugünkü problemləri, ədəbi-mədəni mühitdə müşahidə olunan çatışmazlıqlar və gələcəkdə görülməsi vacib olan işlərlə bağlı fikirlərini bölüşdülər.

Görüşdə qarşıdakı fəaliyyət planları da müzakirə olundu. Bu il həyata keçirilən tədbirlərin davamı olaraq tanınmış milli şair Səhəndin və Güney Azərbaycanın milli fikir və elm tarixində mühüm iz qoymuş Məhəmmədtağı Zehtabinin 100 illiyi ilə bağlı tədbirlərin keçirilməsi nəzərdə tutulur.

Eyni zamanda, Güney Azərbaycanın ədəbi-mədəni həyatını, çağdaş ədəbi prosesi və yaradıcı qüvvələri əhatə edəcək ədəbi dərginin nəşrə hazırlanması məsələsi ətrafında fikir mübadiləsi aparılıb.

Görüş Güney Azərbaycanın milli-mədəni və ədəbi həyatına daha yaxından dəstək göstərilməsi, mövcud problemlərin diqqətdə saxlanılması və qarşıdakı fəaliyyətin daha sistemli şəkildə davam etdirilməsi ilə bağlı müzakirələrlə yekunlaşıb.