07:56

Xırdalan şəhərində, Mehdi Hüseynzadə küçəsində 4 mərtəbəli daş binada partlayış olub.

Axar.az-ın hadisə yerində olan əməkdaşının sözlərinə görə, binada səhər saat 7 radələrində, qaz sızması səbəbindən baş verən partlayış nəticəsində xəsarət alanlar var. Hazırda 7 nəfərin dağıntı altında qaldığı, onlardan 3 nəfərinin uşaq olduğu deyilir.

Hadisə yerində xilasedicilər işləyir.

08:22

Əməkdaşımızın sözlərinə görə, artıq bir nəfər - Bəkir adlı şəxs dağıntı altından çıxarılıb. Onun xəsarətinin həyat üçün təhlükəli olmadığı bildirilir.

Bu arada binanın uçmaq ehtimalına görə xilasedicilər əhalini binanın önündən uzaqlaşdırmağa çalışır.

09:34

Hadisə ilə bağlı Fövqəladə Hallar Nazirliyi məlumat yayıb. Nazirlikdən Axar.az-a verilən məlumata görə, 112 qaynar telefon xəttinə daxil olmuş məlumata əsasən, Abşeron rayonu, Xırdalan şəhərində tikintisi başa çatmamış beşmərtəbəli yaşayış binasında partlayış hadisəsi baş verib.

Dərhal Fövqəladə Hallar Nazirliyinin müvafiq xilasetmə qüvvələri hadisə yerinə cəlb olunub. Hazırda xilasedicilər tərəfindən 3 nəfər xilas edilib, 2 nəfərin xilasedilməsi istiqamətində işlər davam etdirilir. Əlavə məlumat veriləcək.

10:04

Əməkdaşımızın verdiyi xəbərə görə, dağıntılar altında Məharət Abbasovun özüylə bərabər, həyat yoldaşı, qızı və oğlunun qaldığı bildirilir. Hazırda xilasedicilər Məharətin həyat yoldaşı Könül Abbasova və onun qızını dağıntılar altından çıxarırlar. Digər xilasetmə əməliyyatları davam edir.

Bu dəqiqələrdə Abşeron Rayon Polis İdarəsinin rəisi hadisə yerinə gəlib.

Qəza yerinə texnika cəlb edilib.

10:47

Əməkdaşımızın verdiyi məlumata görə, uçqunlar altından çıxarılanlardan biri dünyasını dəyişib. Ərazidə olanlar hadisə nəticəsində daha bir neçə nəfərin öldüyü gümanındadırlar.

Rayon rəhbərliyinin hadisə yerinə gəldiyi bildirilir.

***

İlkin ehtimala görə, partlayış ikinci mərtəbədə, hamam otağında baş verib. İkinci mərtəbədə yaşayan Vidadi yanıq xəsarətləri ilə hazırda xəstəxanadadır. Onun həyat yoldaşının isə öldüyü qeyd olunur.

Hazırda uçqun altından Məharət Abbasov və Kifayət adlı sakindən başqa, hamının çıxarıldığı barədə əməkdaşımız məlumat verir.

11:06

Xilasetmə əməliyyatlarına növbəti təhlükə yaranıb. Binanın uçmasından ehtiyat edən xilasedicilər xüsusi dayaqlarla əməliyyatın sonuna qədər uçqunun qarşısını almağa çalışırlar (quraşdırılan dayaqlar sonuncu fotoda).

11:40

Hazırda hadisə yerində Baş prokurorun birinci müavini Rüstəm Usubov, Abşeron rayon icra başçısı Zakir Fərəcov, polis rəisi Şəhriyar Şəmşirli, o cümlədən FHN-in yüksək vəzifəli şəxslərinin olduğu bildirilir.

İctimaiyyətə açıqlama verən rəsmilər dağıntılar altından 8 nəfərin xilas edildiyini. onların hamısının sağ-salamat olduğunu, ağır xəsarət alanlardan heç kimin dünyasını dəyişmədiyini bildiriblər. Yaralıların 3 saylı şəhər klinik xəstəxanasına aparıldığı qeyd olunur.

Evində partlayış olan və yanıq xəsarəti almış Vidadi və onun xanımı Mətanətin vəziyyəti xüsusilə ağır qiymətləndirilir.